Harald tok over som administrerande direktør i Leivik Sveis, november 1994.
Allereie som 10-12 åring starta han si kommersielle «karriere» med salg av husforsikring til husbyggjarane på Heio, som var nabolaget hans i oppveksten. Denne jobben hadde han for Storebrand på 50/50 basis i lag med faren, Bjørn. Skuleferiane var han travelt opptatt med arbeid på Shellstasjonen i Evjo, som faren var deleigar av den gong.
Han hadde fast sommarjobb på Sveisen så lenge han var under utdanning, men valde å søkja seg jobb utanfor familieverksemda etter at han var uteksaminert frå handelsgymnaset i Haugesund.
Harald drog til Florø og tok seg jobb som yrkesskulelærar i handelsfag. Etter ynskje frå far sin, kom Harald tilbake til Stord sommaren 1973 og tok jobb på Leirvik Sveis.
I samband med at verksemda gjekk over til å bli aksjeselskap (1973) vart Bjørn Karlsson økonomisjef, og Harald vart tilsett som bokhaldar. Då faren døydde eitt år seinare, fekk Harald tilsetting som økonomisjef. No gjekk det raskt oppover i gradene, der han seinare fekk tittelen merkantilsjef, med ansvar for økonomi, personal, marknad og innkjøp.
I 1994 gjekk han over til stillinga som administrerande direktør, etter at Per O. Bjelland valte å bli arbeidande styreformann.
På same måte som Per O. Bjelland, har Harald Karlsson vore med gjennom heile Leirvik Sveis sin offshore-periode. Og han fekk gradvis større og større ansvar for den økonomiske delen av drifta.
Som adm. dir. hadde Harald ulike oppgåver/verv:
- Konserndirektør i Apply Gruppen, i tillegg til jobben som adm. dir. på Stord
- I periodar var han styreleiar i Leirvik Sveis sine dotterselskap, både i Sverige, Nigeria og Houston
- Nestleiar i Hordaland Industriforening
- Styreleiar i TBL Offshore og styremedlem i TBL (Norsk Industri i dag)
- Medlem i diverse offentlege utval som Ekspertutvalet for Olje- og Energiminister (4 forskjellige statsrådar), NORSOK osv.
- Styremedlem i SKL AS som Stord kommune sin representant
Utanom Leirvik Sveis har Harald Karlsson markert seg – både som idrettsadministrator, og som ein sentral «idrettspolitikar» i Stord.
Foreiningsarbeid har alltid vore i hans interesse, og han hadde mange lokale, regionale og nasjonale verv, som bl.a.:
- Frå og med 1978 hadde Harald Karlsson eitt eller anna tillitsverv i Stord Turn- & Idrettslag. Frå 1986 til og med 1994 som leiar av hovudstyret i ST&I.
- Stordhuset, helsesportløypa i Prestegardsskogen, idrettsskulen, den nye store idrettshallen på Vikahaugane, trimløypa i Landåsen, lysløypa ved Fjellstova: Alt dette har han vore med på å få realisert dei åtte åra han sat som leiar av ST&I.
- Lokal formann i Stord Junior Chamber, derav 2 periodar som medlem av landsstyret med deltaking på verdskongressar i Johannesburg, Sydney og Berlin.
- President i Stord/Fitjar Lions
Harald jobba som administrerande direktør til han gjekk av som pensjonist, 01.01.2011.
Han har sjølvsagt ikkje gitt seg heilt når det gjeld verv; blant anna er han styreleiar i Stord Hotell.
